NLC’யில் தொடரும் தீ விபத்து! தொழிலாளர்களுக்கு உயர் சிகிச்சையும், இழப்பீடும், மீண்டும் பணி சேர இயலாதவர் குடும்பத்தினருக்கு வேலைவாய்ப்பும் வேண்டும் வேல்முருகன் கோரிக்கை!
Editor Zhagaram
என்.எல்.சியின் அலட்சியத்தால் தொடரும் தீ விபத்து! பாதிக்கப்படும் அப்பாவி தொழிலாளர்கள்!
நெய்வேலியில் உள்ள அனல்மின் நிலையத்தில் ஏற்பட்ட தீ விபத்தில் 5 தொழிலாளர்கள் தீக்காயம் அடைந்துள்ளனர் என்ற செய்தி அதிர்ச்சியையும், வேதனையும் அளிக்கிறது.
ஒன்றிய அரசின் கட்டுப்பாட்டில் உள்ள நெய்வேலி அனல்மின் நிலையத்தில் அடிக்கடி தீ விபத்து ஏற்படுவது வாடிக்கையாகி விட்டது. அதன் தொடர்ச்சியாக, தற்போது ஏற்பட்டுள்ள தீ விபத்தில், 5 தொழிலாளர்கள் படுகாயம் அடைந்துள்ளனர்.
கடந்த காலங்களில் அனல்மின் நிலையத்தில் ஏற்பட்ட தீ விபத்தில் இருந்து, என்.எல்.சி நிர்வாகம் எந்த பாடத்தையும் கற்றுக்கொள்ளவில்லை என்பதை, இப்போது ஏற்பட்டுள்ள தீ விபத்து பறைசாற்றுகிறது.
கடந்த காலங்களில் ஏற்பட்ட தீ விபத்தில் இருந்து பாடம் கற்று, விபத்துக்கு காரணமான அதிகாரிகள் மீது நடவடிக்கை எடுத்திருந்தால், தற்போது ஏற்பட்டுள்ள தீ விபத்தை தவிர்த்திருக்கலாம். தொழிலாளர்களும் பாதிக்கப்பட்டிருக்க மாட்டார்கள்.
தமிழ்நாடு, கர்நாடகம், ஆந்திரா, புதுச்சேரி உள்ளிட்ட மாநிலங்களுக்கு, நெய்வேலி அனல்மின் நிலையம் வாயிலாக மின் விநியோகம் செய்யப்படுகிறது. அதற்கேற்றால் போல், உயர் தொழில்நுட்பத் திறனைக் கணக்கிலெடுத்து அவர்களிடம் பராமரிப்புப் பணியை ஒப்படைத்திருக்க வேண்டும்.
அதற்கு மாற்றாக, என்.எல்.சி நிர்வாகம், தனக்கு வேண்டப்பட்டவர்களுக்கும், உயர்தொழில் நுட்ப வசதியில்லாத நிறுவனத்திற்கும், பராமரிப்பு மேற்கொள்ள ஒப்பந்தம் வழங்குவதால், இப்படியான தீ விபத்து தொடர்கதையாகி வருகிறது.
அதுமட்டுமின்றி, என்.எல்.சியில் உள்ள காலிப்பணியிடங்களை முழுமையாக நிரப்பாமல் இருப்பதும், தொலைநோக்குப் பார்வையுடன் முறையான கண்காணிப்பு செய்யாமலிருப்பதும், பாதுகாப்பு சாதன பற்றாக்குறையும், நிர்வாகத்தின் அக்கறையற்ற தன்மையை காட்டுகிறது. மேலும், தொழிலாளர்களின் உயிரை துச்சமென கருதும் நடவடிக்கையாகும்.
எனவே, எதிர் வரும் காலங்களில், இதுபோன்ற விபத்துகள் நடக்காமல் இருப்பதற்கான வழிகாட்டுதலை என்.எல்.சி நிர்வாகம் உருவாக்க வேண்டும்.
மேலும், விபத்தில் காயமடைந்த 5 தொழிலாளர்களுக்கு, உயர் சிகிச்சை அளிக்க வேண்டும். காயமடைந்தவர்களுக்கு போதுமான இழப்பீடும், மீண்டும் பணியில் சேர முடியாதவர்களுக்கு, அவர்கள் குடும்பத்தில் ஒருவருக்கு மாற்று வேலைவாய்ப்பும் அளிக்க வேண்டும்.
விபத்து ஏற்பட்டதற்கான காரணங்களை ஆராய, தொழிற்சங்க நிர்வாகிகள் அடங்கிய, உயர்மட்ட விசாரணை குழு அமைத்து, விபத்துக்கு காரணமாக அதிகாரிகள் மீது நடவடிக்கை எடுக்க, என்.எல்.சி நிர்வாகம் முன் வர வேண்டும் என தமிழக வாழ்வுரிமைக் கட்சி கேட்டுக்கொள்கிறது.
இவ்விவகாரத்தில் தமிழ்நாடு அரசும் உரிய நடவடிக்கை எடுக்க வேண்டும் என தமிழக வாழ்வுரிமைக் கட்சி வேண்டுகோள் விடுக்கிறது.
