“நாடாளுமன்றத்தில் நம்பிக்கையில்லா தீர்மானம் கொண்டுவரப்பட்டதும், இதில் வெளிநாட்டு சதி இருப்பதாக கூறும் பிரதமர் இம்ரான் கான், சதி பற்றி தெரிந்ததும் ஏன் அதைச் சொல்லவில்லை?” என பாகிஸ்தான் எதிர்கட்சித் தலைவர் ஷெபாஸ் ஷெரீப் கேள்வி எழுப்பியுள்ளார்.
பாகிஸ்தானில் அந்நாட்டு பிரதமர் இம்ரான் கானின் மீது எதிர்கட்சிகள் நம்பிக்கையில்லா தீர்மானம் கொண்டு வந்தன. இந்த நம்பிக்கையில்லா தீர்மானத்தின் மீதான விவாதம் நேற்று ஞாயிற்றுக்கிழமை அந்நாட்டு நாடாளுமன்றத்தில் நடக்க இருந்த இருந்த நிலையில், நம்பிக்கையில்லா தீர்மானத்தின் மீதான வாக்கெடுப்பை அந்நாட்டின் துணை சபாநாயகர், இது அரசியலமைப்புக்கு எதிரானது என நிராகரித்தார். நாட்டு மக்களிடம் உரையாற்றிய இம்ரான் கான், நாடாளுமன்றத்தை கலைக்குமாறு அதிபருக்கு தான் கடிதம் எழுதியுள்ளதாகவும், பாகிஸ்தானில் விரைவில் நாடாளுமன்றத் தேர்தல் நடைபெறும் என்றும் தெரிவித்திருந்தார்.
இந்த நிலையில், நாடாளுமன்றத்தில் தன் மீது கொண்டுவரப்பட்ட நம்பிக்கையில்லா தீர்மானத்தில் வெளிநாட்டு சதி இருப்பதாக கூறும் இம்ரான் கானின் கருத்தை, அந்நாட்டு எதிர்கட்சித் தலைவர் ஷெபாஸ் ஷெரீப் மறுத்துள்ளார். இதுகூறித்து அவர் கூறும்போது, “நம்பிக்கையில்லா தீர்மானத்தின் மீது இம்ரான் கானுக்கும் அவரது கட்சியினருக்கும் ஆட்சேபனை இருந்திருந்தால், அவர் அதை ஏன் மார்ச் 24-ம் தேதியே நாடாளுமன்றத்தில் எழுப்பவில்லை.
அரசியலமைப்பு சட்டத்தின்படி நடக்க இருந்த இழப்பைச் சந்திக்க முடியாமல், அவர்கள் வெளிநாட்டு சதி இருப்பதாக பேசியுள்ளனர். இம்ரான் கானும் அவரது கட்சியினரும் நேற்று ஞாயிற்றுக்கிழமை அரசியலமைப்புச் சட்டத்தை மீறியுள்ளனர். நாடாளுமன்றத்தில் நம்பிக்கையில்லா தீர்மானம் தாக்கல் செய்யப்பட்டது மார்ச் 8-ம் தேதி. அவர்கள் சொல்லுவது போல, மார்ச் 7-ம் தேதி அமெரிக்காவில் இருந்து செய்தி வந்திருந்தால், அதை இம்ரான் கானும் அவரது கட்சியினரும் அதை ஏன் மார்ச் 24-ம் தேதியே நாடாளுமன்றத்தில் எழுப்பவில்லை.
