கட்டாயத் தடுப்பூசிக்கு பொறுப்பேற்காத இந்திய ஒன்றிய அரசுக்கு கண்டனம்! மக்கள் மருத்துவக் கூட்டமைப்பு ஒருங்கிணைப்பாளர் கி.வெங்கட்ராமன் அறிக்கை!

கட்டாயத் தடுப்பூசிக்கு பொறுப்பேற்காத இந்திய ஒன்றிய அரசுக்கு  கண்டனம். மக்கள் மருத்துவக் கூட்டமைப்பு ஒருங்கிணைப்பாளர் கி. வெங்கட்ராமன்!

• கொரோனா பெருந்தொற்றுக் காரணமாக கோவிட்-19 நோயால் ஏற்பட்ட பாதிப்பு அச்சமூட்டிய சூழலைப் பயன்படுத்தி, இந்திய அரசும், தமிழ்நாடு உள்ளிட்ட பல்வேறு மாநில அரசுகளும் கட்டாயத் தடுப்பூசித் திட்டத்தைச் செயல்படுத்தின.
• கோவிட்-19 தடுப்பூசியில், இறப்பு மற்றும் மீளமுடியாத நோய்கள் மற்றும் உடல் பாதிப்புகள் ஏற்பட்டு வருவது குறித்து உச்ச நீதிமன்றத்தில் தொடுக்கப்பட்ட வழக்கில், நேற்று (29.11.2022) பதில் அறிக்கை தாக்கல் செய்துள்ள இந்திய அரசு, “கோவிட்-19 தொடர்பான தடுப்பூசிகள் மனிதர்களுக்கு ஏற்படுத்தும் மரணம் குறித்தோ, உடல் ஊறு குறித்தோ இந்திய அரசு பொறுப்பேற்க முடியாது. அவ்வாறு பொறுப்பேற்குமாறு நீதிமன்றமும் வலியுறுத்த முடியாது” என்று வாதிட்டுள்ளது.

• ஏற்கெனவே உச்ச நீதிமன்றம், டாக்டர் ஜேக்கப் புல்லியல் – எதிர் –  இந்திய ஒன்றிய அரசு (Writ Petition (Civil) No. 607 of 2021) என்ற இவ்வழக்கில், கட்டாயத் தடுப்பூசி கூடாது எனத் தீர்ப்புரைத்தது. அந்த வழக்கில்கூட, இந்திய அரசு கோவிட்-19 தடுப்பூசி யார் மீதும் கட்டாயப்படுத்தப்படவில்லை, மக்கள் தடுப்பூசியைப் பயன்படுத்து மாறு அரசு வலுவாக ஊக்கப்படுத்தி தான் வருகிறது என்று பொய்யுரைத்தது.
• குறிப்பாக, தமிழ்நாட்டிலும், புதுச்சேரியிலும் பள்ளிச் சிறார்கள் தொடங்கி, முதியோர் வரை தடுப்பூசி செலுத்திக் கொள்ளுமாறு கட்டாயப்படுத்தப்பட்டதை ஊரறியும்.
• இதுகுறித்து, கேள்வி எழுந்தபோதெல்லாம் இந்திய அரசு, தமிழ்நாடு உள்ளிட்ட மாநில அரசுகளுக்குக் கொடுத்துள்ள ஆணையைத் தான் தமிழ்நாடு அரசும் எடுத்துக்காட்டியது.
• “வலுவாக ஊக்கப்படுத்துவது” என்ற பெயரால், தடுப்பூசி போடாதவர்கள் தொடர்வண்டியில் ஏறக்கூடாது, பொதுப் போக்கு வரத்திற்கு வரக்கூடாது, பொது இடங்களுக்கும், சந்தைகளுக்கும் வரக்கூடாது என்று நிர்பந்திக்கப்பட்டதை நீதிமன்றத்தில் இந்திய அரசும், தமிழ்நாடு அரசும் மறைத்துப் பொய் கூறின.

• கோவாக்சின் உள்ளிட்டு கோவிட்-19 தடுப்பூசி தயாரிக்கும் அனைத்து நிறுவனங்களும், இத்தடுப்பூசியைச் செலுத்திக் கொள்வதால் ஏற்படும் மரணம் உள்ளிட்ட தீய விளைவுகள் குறித்து, சட்ட சடங்காக சில மேலோட்டமான தகவல்களைத் தெரிவித்துவிட்டு, இறுதியில் அவ்விளைவுகளுக்குத் தாங்கள் பொறுப்பேற்க முடியாது என்பதை அறிவித்துவிட்டன.
• பெருங்குழும மருத்துவமனைகள் உள்ளிட்டு, தனியார் மருத்துவ மனைகள் அனைத்தும், கோவிட்-19 தடுப்பூசியின் தீய விளைவுகளுக்குப் பொறுப்பேற்க மறுத்தன.
• இப்போது மீண்டும், இந்திய அரசும் மறுத்திருக்கிறது. 
• கோவிட்-19 தடுப்பூசி செலுத்திக் கொண்டோர், அதன் தீய விளைவுகள் குறித்து, நேரடியாகப் புகார் தெரிவிக்க வாய்ப்புகள் பெரிதும் அடைக்கப்பட்ட சூழலில் – அரசின் ஆரம்ப சுகாதார நிலையம் அல்லது அரசு மருத்துவர் வழியாகத்தான் புகார் கொடுக்க முடியும் என்று நிர்பந்திக்கப்பட்ட சூழலில், இத்தடுப்பூசியால் ஏற்பட்ட பாதிப்பு குறித்து முழுமையான விவரங்கள் அதிகாரப்பூர்வமாக வெளிவர வாய்ப்பு மறுக்கப்பட்டது.
• இப்போது, அதையே சான்றாகக்கூறி, தடுப்பூசியால் ஏற்பட்ட பாதிப்பு ஒரு விழுக்காட்டிற்கும் குறைவு என இந்திய அரசு பொய்யுரைக்கிறது.

• இந்திய அரசின் இந்தப் பொய்யுரையை உச்ச நீதிமன்றம் ஏற்கக் கூடாது! இதற்கென்று, மருத்துவர்கள் உள்ளிட்ட வல்லுநர் குழுவை அமர்த்தி, தமிழ்நாடு உள்ளிட்டு இந்தியாவின் பிற மாநிலங்களிலும் கோவிட்-19 தடுப்பூசியால் ஏற்பட்ட தீய விளைவுகள் குறித்து, தற்சார்பான ஆய்வு நடத்தி, உச்ச நீதிமன்றம் முடிவெடுக்க வேண்டும்.
• மரணம் உள்ளிட்ட உடல்நல பாதிப்புகள் ஏற்பட்டோருக்கு ஒன்று, அம்மருத்துகளைத் தயாரித்த நிறுவனமோ அல்லது அரசோ பொறுப்பேற்க வேண்டும் என ஆணையிட வேண்டும் என்று   மக்கள் மருத்துவக் கூட்டமைப்பு சார்பில் வலியுறுத்திக் கேட்டுக் கொள்கிறேன்.